El me paese

Un posto chièto, in mezo a la pianura,

caséte basse in fila su la strada

col mus-cio tacà ai muri in tramontana

e vasi de gerani sui balconi.

Un posto chièto dove in primavera

le viole le improfuma l'aria e intorno

se vede campi de frutari in fiore

e nuvole de ave e de farfale.

Un posto chièto dove in cimitèro

se parla sotovoze. Un posto dove

d'istà, col caldo, in grupo dopo zena

la zente la se sènta sui scalini,

e fin che 'a speta el fresco de la note

la ciacola contenta un fià de tuto:

de chi magari ga trovà un lavoro,

parchè xé un toco che non piove più,

che la pension l'è poca o che '1 Comune

noi ga gnancòra messo un fià de asfalto

davanti al capitelo de la Madona

che '1 prete ghe tegnéva cussi tanto.

Un posto chièto dove 'na disgrazia

la mete insieme tuta l'amicizia

che no abandòna mai nessun da solo

e porta, come gnente, el peso insieme.

Un posto par podere un fià pensare,

distante dal bacàn, a le me robe,

un posto senza storia né pretese,

un posto chièto .. .eco el me paese.